3 Aprel 2023-cü il tarixdə Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin və Naxçıvan Şəhər Təhsil Şöbəsinin birgə təşkilatçılığı ilə “Heydər Əliyev İli” çərçivəsində “Ümummilli lider Heydər Əliyev dahi şəxsiyyətdir” mövzusunda Naxçıvan şəhər ümumtəhsil məktəblərinin IX - XI sinif şagirdləri arasında inşa yazı müsabiqəsi keçirilmişdir.
Müsabiqəyə başlamazdan əvvəl Vətən müharibəsində və Azərbaycanın ərazi bütövlüyü uğrunda canını qurban verən şəhidlərimizin əziz xatirəsi bir dəqiqəlik sükutla yad edilib.
Naxçıvan şəhər Təhsil Şöbəsinin müdiri Baba Əliyev və Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin rəisi polkovnik-leytenant Anar Aqilov çıxış edərək ümummilli lider Heydər Əliyevin zəngin həyat yolu, çoxşaxəli fəaliyyəti barədə söhbət açıblar. Daha sonra müsabiqənin şərtləri izah edilib, şagirdlərə uğurlar arzulanıb.
30-a yaxın şagirdin iştirak etdiyi müsabiqədə şagirdlər 1 saat 30 dəqiqə ərzində ümummilli lider Heydər Əliyevin həyat və fəaliyyəti barədə inşa yazıblar.
Yekun nəticələrə əsasən, Naxçıvan şəhər 9 nömrəli tam orta məktəbin şagirdi Seyidova Gülüsüm Ehtibar qızı 1-ci yerə, 11 nömrəli tam orta məktəbin şagirdi Allahyarova Aytən Rəşad qızı 2-ci yerə, 1 nömrəli tam orta məktəbin şagirdi Talıbova İnci Şahmar qızı 3-cü yerə layiq görülüb.
Yekunda yer tutan şagirdlərə təşkilatçıların fəxri fərmanları təqdim edilib, xatirə şəkli çəkilib.
