Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin, Naxçıvan Muxtar Respublikası Əlahiddə Ümumqoşun Ordusunun, Naxçıvan Şəhər Gənclər və İdman idarəsinin və Naxçıvan Şəhər Təhsil Şöbəsinin birgə təşkilatçılığı ilə Naxçıvan şəhərində fəaliyyət göstərən tam orta ümumtəhsil məktəblərinin şagirdlərindən ibarət komandalar arasında “Şahin” hərbi idman oyunları keçirilmişdir.
Çıxış edənlər yarışda iştirak edən komandaların üzvlərinə uğurlar arzulayıblar. Bildirilib ki, “Şahin” hərbi idman oyunlarının keçirilməsində əsas məqsəd böyüməkdə olan gənc nəslin hərbi vətənpərvərlik tərbiyəsinə diqqəti daha da artırmaq, məktəbliləri hərbi idman oyunlarına geniş cəlb etməklə onların ordu sıralarında xidmətə hazırlanmasına kömək göstərilməkdən ibarətdir. Yarışın qaydaları diqqətə çatdırıdıqdan sonra komandalar oyuna hazır olub.
6 komandanın iştirakı ilə həyata keçirilən idman oyunlarında komandalar arasındakı mübarizə maneələrin dəf olunması, yaralılara ilkin tibbi yardımın göstərilməsi, mülki müdafiə hazırlığı, sıra hazırlığı, turnikdə dartınma və 100 metr məsafəyə qaçış mərhələləri üzrə keçirilmişdir.
Yekun nəticələrə əsasən, İlk üçlükdə yer tutan komandalar Naxçıvan şəhər 9 nömrəli tam orta məktəbin komandası 1-ci yerə, 1 nömrəli tam orta məktəbin komandası 2-ci yerə, 14 nömrəli tam orta məktəbin komandası 3-cü yerə layiq görülüb. Qaliblərə təşkilatçıların diplom, fəxri fərman və kubokları təqdim edilib.