Ordubad rayon məktəblərinin komandaları arasında “Şahin” hərbi idman oyunları keçirilib. Əlahiddə Ümumqoşun Ordunun, Səfərbərlik və Hərbi Xidmətə Çağırış üzrə Dövlət Xidmətinin Naxçıvan üzrə baş idarəsinin Ordubad rayon bölməsinin, Ordubad rayon Gənclər İdman İdarəsinin və Ordubad rayon Təhsil Şöbəsinin birgə təşkilatçılığı ilə keçirilən oyunlarda komandalar sıra hazırlığı, avtomatın sökülüb yığılması, darağın doldurulub boşaldılması, fiziki hazırlıq, turnikdə dartınma, yaralının zəhərli zonadan çıxarılması, yaralıya ilkin tibbi yardımın göstərilməsi, intellektual müsabiqə mərhələləri üzrə öz qüvvələrini sınayıblar.
Ordubad rayon məktəblərindən 72 şagirdin mübarizə apardığı oyunlarda Ordubad Şəhər İnternat Məktəbi 1-ci yerin, 1 nömrəli tam orta məktəb 2-ci yerin, Sabirkənd tam orta məktəb isə 3-cü yerin qalibi olmuşdur.
Sonda qalib komandalar təşkilatçıların diplom, fəxri fərman və kubokları ilə mükafatlandırılılmışlar.
Qeyd edək ki, hərbi oyunların təşkilində məqsəd gənclərdə vətəndaşlıq və vətənpərvərlik tərbiyəsinin aşılanması, məktəbliləri hərbi-idman oyunlarına cəlb etməklə onların ordu sıralarında hərbi xidmətə hazırlanmasına köməklik göstərmək, çağırışçı gənclərin fiziki sağlamlığının möhkəmləndirilməsi və hərbi xidmətə hazırlığının artırılmasından ibarətdir.
