Ordubad rayonunda Şəhid Məmmədəliyev Saday Rza oğlunun əziz xatirəsinə yüngül atletika üzrə yarış keçirilib.
Əvvəlcə şəhidin məzarı ziyarət olunub.
Rayonun ümumtəhsil məktəblərinin şagirdləri arasında keçirilən yarış Səfərbərlik və Hərbi Xidmətə Çağırış üzrə Dövlət Xidmətinin Ordubad Rayon Şöbəsinin, Ordubad Rayon Gənclər və İdman İdarəsinin və Təhsil İdarəsinin birgə təşkilatçılğı ilə baş tutub. Birincilik Ordubad rayon stadionunda keçirilib.
100, 200, 400 metr məsafəyə qaçış üzrə rayondan 12 məktəbin şagirdi birincilik uğrunda mübarizə aparıb. 72 yeniyetmənin iştirak etdiyi yarışda qızlar arasında 1-ci yerlərdə 100 metr məsafədə Nazənin Cəfərova, 200 metr məsafədə Xanım Əliyeva, 400 metr məsafədə Sona Əliyeva qərarlaşıb.
Oğlanlar arasında 1-ci yerlərin qalibi 100 metr məsafədə Nihad Nəcəfov, 200 metr məsafədə Bilal Musayev, 400 metr məsafədə Uğur Babasoy olub.
İlk üç yerin sahibləri təşkilatçılar tərəfindən diplom və medallarla təltif edilib.