Aprelin 18-də Sədərək Rayon Mərkəzi Stadionunda “Vətənin Müdafiəsinə Hazıram” poliatlon çoxnövçülüyü üzrə rayon birinciliyi keçirilib. Səfərbərlik və Hərbi Xidmətə Çağırış üzrə Dövlət Xidmətinin Naxçıvan Muxtar Respublikası üzrə baş idarəsinin Sədərək rayon bölməsinin, Gənclər və İdman İdarəsinin və Təhsil Şöbəsinin birgə təşkilatçılığı ilə keçirilən idman oyunlarının məqsədi çağırışyaşlı və çağırışaqədərki gənclərin hərbi vətənpərvərlik ruhunda tərbiyə olunması, vətənpərvərlik hisslərinin aşılanması və gənclərin hərbi xidmətə hazırlıq səviyyəsinin yüksəldilməsi olub.
4 komandadan ümumilikdə 20 məktəbli poliatlon çoxnövçülük proqramına uyğun olaraq 100 və 2000 metr məsafəyə qaçış, turnikdə dartınma növləri üzrə yarışıblar.
Yekun nəticələrə əsasən, Dəmirçi kənd tam orta məktəbin komandası I, Sədərək kənd 2 saylı tam orta məktəbin komandası II, Heydərabad qəsəbə tam orta məktəbin komandası III yerə layiq görülüb.Yer tutan komandalara təşkilatçılar tərəfindən kubok və diplomlar təqdim olunub.
