Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Kəngərli Rayon Şöbəsinin, Kəngərli Rayon Gənclər və İdman İdarəsinin və Kəngərli Rayon Təhsil Şöbəsinin birgə təşkilatçılığı ilə Kəngərli rayon İdman Meydançasında yeniyetmə və gənclər arasında “Vətənin müdafiəsinə hazıram” poliatlon çoxnövçülüyü üzrə rayon birinciliyi keçirilib. Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Kəngərli rayon şöbəsinin zabiti kapitan Abbas Abbaslı tədbiri açaraq qeyd etmişdir ki, bu cür yarışların keçirilməsi yeniyetmə və gənclərin hərbi vətənpərvərlik ruhunda tərbiyə olunmasında, vətənpərvərlik hisslərinin aşılanmasında və gənclərin hərbi xidmətə hazırlıq səviyyəsinin yüksəldilməsində mühüm əhəmiyyət kəsb edir. Kəngərli Rayon Gənclər və İdman İdarəsinin rəisi Vüsal Hüseynov və Kəngərli Rayon Təhsil Şöbəsinin nümayəndəsi Teymur Əsgərov da çıxışlarında keçirilən yarışın məqsədi haqqında danışmış və komandalara uğurlar diləmişdir.
Poliatlon dördnövçülük proqramına uyğun olaraq yarış 100 metr qaçış, 2000 metr kross, qumbara atmaq və turnikdə dartınmaq növləri üzrə keçirilib. Yarışda 9 komandanın tərkibində 45 şagird mübarizə aparıb. Rayon birinciliyinin yekun nəticələrinə əsasən, Şahtaxtı kənd tam orta məktəbin komandası birinci, Qarabağlar 1 nömrəli tam orta məktəbin komandası ikinci, Böyükdüz kənd tam orta məktəbin komandası üçüncü yerlərə layiq görülüblər.
Sonda qaliblərə diplom, kubok və hədiyyələr təqdim olunub.