Ordubad rayon “N” saylı hərbi hissədə rayon məktəblərinin komandaları arasında “Şahin” hərbi idman oyunları keçirilib. Xatırladaq ki, oyunlar böyüməkdə olan gənc nəslin vətənpərvərlik tərbiyəsinə diqqət və qayğını artırmaq, onların ordu sıralarında xidmətə hazırlanmasına kömək göstərmək məqsədi ilə keçirilir.
Əlahiddə Ümumqoşun Ordunun, Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Ordubad Rayon Şöbəsinin, Ordubad Rayon Gənclər İdman İdarəsinin və Ordubad Rayon Təhsil Şöbəsinin birgə qərarı əsasında keçirilən oyunlarda komandalar maneələrin dəf olunması, mülki müdafiə hazırlığı, yaralıya ilkin tibbi yardım, 100 metr məsafəyə qaçış, turnikdə dartınma, sıra hazırlığı mərhələləri üzrə öz qüvvələrini sınayıblar.
Oyunun yekun nəticələrinə görə Sabirkənd kənd tam orta məktəbi 1-ci, Ordubad rayon 3 nömrəli tam orta məktəb 2-ci, Dəstə kənd tam orta məktəb isə 3-cü yerə layiq görülüb.
Sonda qalib komandalar təşkilatçıların diplom, fəxri fərman və kubokları ilə mükafatlandırılıblar.