Şərur rayonu ərazisində yerləşən N saylı Sərhəd Zastavasında şagirdlər arasında “Şahin” hərbi idman oyunları keçirilib.
Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Şərur Rayon İdarəsinin, Şərur rayon Gənclər və İdman İdarəsinin və Şərur rayon Təhsil Şöbəsinin birgə təşkilatçılığı ilə Şərur rayon məktəblərinin komandaları arasında təşkil olunan hərbi idman oyunlarında 6 məktəbin komandası mübarizə aparıb. Komandalar sıra hazırlığı, turnikdə dartınma, maneələrin dəf olunması, qumbaraatma, ilk tibbi yardımın göstərilməsi, mülki müdafiə hazırlığı, 100 metr məsafəyə qaçış mərhələləri üzrə yarışıblar. Yekun nəticələrə əsasən ilk üçlükdə yer tutan komandalardan Şərur şəhər 2 nömrəli tam orta məktəb 1-ci yerə, Yengicə kənd tam orta məktəb 2-ci yerə, 1 nömrəli tam orta məktəb isə 3-ci yerə layiq görülüb.
Sonda qalib komandalar təşkilatçıların diplom və fəxri fərmanları ilə mükafatlandırılıblar.