Şahbuz rayonunda “N” saylı hərbi hissədə rayon məktəblərinin komandaları arasında “Şahin” hərbi idman oyunları keçirilmişdir. Oyunlar başlamazdan əvvəl çıxış edən Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Şahbuz Rayon Şöbəsinin baş zabiti Səfər Hüseynov, Şahbuz Rayon Gənclər İdman İdarəsinin rəisi Elvin Hüseynov,Şahbuz Rayon Təhsil Şöbəsinin nümayəndəsi Hüseyn Qəhrəmanov hərbi-idman oyunlarının yeniyetmə və gənclərin hərbi vətənpərvərlik tərbiyəsi işinin gücləndirilməsində və məktəblilərin hərbi xidmətə hazırlıq səviyyəsinin yüksəldilməsindəki əhəmiyyətini vurğulayıblar.
Əlahiddə Ümumqoşun Ordunun, Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Şahbuz Rayon Şöbəsinin, Şahbuz Rayon Gənclər İdman İdarəsinin və Şahbuz Rayon Təhsil Şöbəsinin birgə təşkilatçılığı ilə keçirilən oyunlarda komandalar 100 m məsafəyə qaçış, turnikdə dartınma, qumbaraatma, sıra hazırlığı mərhələləri üzrə öz qüvvələrini sınayıblar.
Yekun nəticələrə görə 1-ci yerdə Keçili kənd tam orta məktəbi, 2-ci yerdə Şahbuz rayon 2 nömrəli tam orta məktəb, 3-cü yerdə isə Şahbuz rayon 1 nömrəli tam orta məktəb qərarlaşıb.
Sonda qalib komandalar təşkilatçıların diplom, fəxri fərman və kubokları ilə mükafatlandırılıblar