Naxçıvan şəhərindəki “N” saylı hərbi hissədə Səfərbərlik və Hərbi Xidmətə Çağırış üzrə Dövlət Xidmətinin Naxçıvan Muxtar Respublikası üzrə baş idarəsinin, Naxçıvan Muxtar Respublikası Gənclər və İdman Nazirliyi, Əlahiddə Ümumqoşun Ordusu və Təhsil Nazirliyinin birgə təşkilatçılığı ilə “Şahin” hərbi-idman oyunlarının Naxçıvan Muxtar Respublikası üzrə zona birinciliyi keçirilib.
Açılış mərasimində təşkilatçıların nümayəndələri çıxış edərək tədbirin mahiyyəti haqqında iştirakçılara ətraflı məlumat vermiş, gənclərin hərbi-vətənpərvərlik tərbiyəsinin əhəmiyyətini bir daha vurğulamış və şahinlərə uğurlar arzulamışlar.
Sonra yarışlara start verilmişdir. Yarışda məktəblilər sıra hazırlığı, darağa patron doldurulması və boşaldılması, avtomatın sökülməsi və yığılması, tüfəngdən hədəfə atəş açmaq, fiziki hazırlıq, maneələrin dəf olunması, mülkü müdafiə hazırlığı və digər tapşırıqları yerinə yetirmişlər. Yarışda 7 komanda 9 mərhələ üzrə mübarizə aparıblar.
Yekun nəticəyə əsasən, Naxçıvan şəhər 1 nömrəli tam orta məktəb birinci yerə layiq görülüb. Şahbuz rayon Keçili kənd tam orta məktəbin komandası ikinci, Ordubad Şəhər İnternat tam orta məktəbinin komandası isə üçüncü olub.
Qaliblər təşkilatçılar tərəfindən diplom, fəxri fərman və kuboklarla təltif ediliblər.
Məlumat üçün bildirək ki, Naxçıvan şəhər 1 nömrəli tam orta məktəb Bakı şəhərində keçiriləcək “Şahin” hərbi-idman oyunlarının respublika finalında muxtar respublikanı təmsil edəcəklər.
