Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Şahbuz Rayon Şöbəsində Nazirlər Kabinetinin müvafiq sərəncamı ilə təltif olunan Vətən müharibəsi iştirakçılarına və qazilərə medallar təqdim olunub.
Əvvəlcə şəhidlərimizin əziz xatirəsi 1 dəqiqəlik sükutla yad edilib.
Səfərbərlik və Hərbi Xidmətə Çağırış üzrə Dövlət Xidmətinin Şahbuz Rayon Şöbəsinin rəisi kapitan Qorxmaz Şükürlü Vətənimizin ərazi bütövlüyü uğrunda şücaət göstərən Vətən müharibəsi iştirakçılarını təbrik edib. Bildirilib ki igid vətən oğullarının vətən sevgisi və göstərdikləri fədakarlıqlar dövlətimiz və xalqımız tərəfindən heç zaman unudulmayacaq.
Daha sonra baş leytenant Quliyev Mahmud İlham oğluna, əsgər Quliyev Fərid Malik oğluna, əsgər Kərimov Mirkənan Mirismayıl oğluna, əsgər Rəhimov Qurban Məhərrəm oğluna, əsgər Məmmədov Sahil Talıb oğluna, əsgər Muradlı Nihad Xudayar oğluna, əsgər Yavərsoylu İsa Həmdulla oğluna və əsgər Rəhimov Kamal Famil oğluna medallar təqdim olunub.
44 günlük İkinci Qarabağ müharibəsinin qəhrəman döyüşçülərindən biri olan Kənan Kərimov çıxış edərək İkinci Qarabağ müharibəsində keçdikləri döyüş yolunun hər bir hərbi qulluqçu üçün əvəzsiz xatirə olduğunu bildirib, dövlətimiz tərəfindən onlara göstərilən diqqətə görə də təşəkkür edib.
