Şərur rayon Şəhidlər xiyabanında şəhidin məzarı ziyarət olunub, anım mərasimi keçirilib. Səfərbərlik və Hərbi Xidmətə Çağırış üzrə Dövlət Xidmətinin Naxçıvan Muxtar Respublikası üzrə baş idarəsinin Şərur Rayon rayon bölməsinin, və İcra Hakimiyyətinin nümayəndələri, şəhidin ailə üzvləri, yaxınları və qazilər iştirak ediblər.
Tədbir iştirakçıları şəhidin məzarı üzərinə gül dəstələri düzüb və ruhuna dualar oxuyublar.
Mərasimdə Əli Yusifovun şərəfli həyat yolundan, vətənpərvərliyindən danışılıb, Vətən uğrunda həyatlarını qurban verən şəhidlərimizin göstərdikləri fədakarlığın heç zaman unudulmuyacağı, tarix yazan oğulların daima xalqımızın qəlbində yaşayacağı bir daha vurğulanıb.
Azərbaycan Ordusunun leytenantı olan Əli Yusifov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Əli Yusifov oktyabrın 3-də Füzuli döyüşləri zamanı şəhid olub.
Azərbaycan Prezidenti İlham Əliyevin müvafiq Sərəncamlarına əsasən Əli Yusifov ölümündən sonra "Vətən uğrunda", "Xocavəndin azad olunmasına görə", "Füzulinin azad olunmasına görə" medalları ilə təltif edilib.